01.03.2017 – Surmuntà cun success la zona da disturbi

La «muntogna flottanta» è surmuntada: la fin da schaner 2017 è vegnida perfurada la zona da disturbi «corniola da Raibl». La rasada da crappa consistenta d'aua e da glitta vegn uss isolada e segirada cun in rintg da betun cun ina grossezza da 60 centimeters. Sin ils plazzals a Preda ed a Spinas cumenzan il 1. da mars 2017 puspè las lavurs da perfuraziun.

Bunamain senza che la publicitad haja s'accurschì insatge, han ils miniers lavurà durant la pausa d'enviern intensivamain en la caverna al meter da tunnel 1 300. La fin da schaner 2017 han els terminà cun success la perfuraziun da la «corniola da Raibl» schelada. Pir la fin da mars 2017 pon ins dentant metter giu ils agregats da schelentar. Fin lura vegn il vau dal tunnel isolà cunter l'aua e l'auta pressiun da quella. Silsuenter vegn construì in rintg da betun cun ina grossezza da 60 centimeters che segirescha staticamain il tunnel. Pir suenter pon ins cumenzar ad allontanar ils indrizs da schelentar e las ulteriuras installaziuns tecnicas en la caverna.

Las lavurs da perfuraziun cuntinueschan
Las lavurs da perfuraziun da la vart da Preda e da la vart da Spinas cumenzan puspè il 1. da mars 2017. Lavurà vegn set dis l'emna durant 24 uras al di. La segunda mesadad da l'onn 2017 succeda probablamain la perfuraziun da la vart da Preda en la caverna al meter da tunnel 1 300. La perfuraziun vegn fatga cun siglientar. Co che quai funcziuna exactamain, mussa il video agiuntà d'ina siglientada. Fin uss èn vegnids perfurads en il nov tunnel da l'Alvra var 1 400 meters da tunnel resp. var 24 pertschient da l'entir traject d'ina lunghezza da 5 860 meters.