02.10.2018 - Il nov tunnel da l'Alvra da la Viafer retica

02.10.2018 - Il nov tunnel da l'Alvra da la Viafer retica -

Mardi, ils 2 d'october 2018 è vegnì perfurà il nov tunnel da l'Alvra da la Viafier retica (VR). En bun trais onns han ils miniers rut ora nà da Preda e Spinas il tunnel da 5 860 meters tranter la Val d'Alvra e l'Engiadin'Ota. Ins ha uschia cuntanschì in dals terms impurtants dal project che custa 345 milliuns francs.

Curt avant mezdi è la squadra da la vart da Spinas ida tras la fora en il grip ed ha surdà als collegas da la vart da Preda la statua da la sontga Barbara, la patruna dals construiders da tunnels.

Suenter quest mument commovent ed ils pleds d'engraziament da vart dals represchentants da la VR e da las interpresas participadas han ins pudì far in viva sin las prestaziuns ademplidas communablamain. En tut han ins sbuvà 250 000 m3. Il material sbuvà vegn elavurà a Preda e serva sco materia prima per la producziun da betun e glera. Material da qualitad insuffizienta han ins manà sin tschintas da transport a la deponia dal plazzal «Las Piazzettas» dasper Preda. Là vegn el reincorporà en ina moda che sa cunfa cun la cuntrada. La perfuraziun principala dal tunnel da l'Alvra ha gì lieu strusch in onn suenter l'emprima perfuraziun «pitschna» ils 17 d'october 2017, cura ch'ins ha gì surmuntà la zona da disturbi «corniola da Raibl», la zona dal massiv la pli delicata, e cuntanschì l'uschenumnada caverna.

Ulteriuras lavurs en il tunnel

Cun la perfuraziun succedida cumenzan ussa las lavurs da construcziun a l'intern dal tunnel: ins injectescha l'ultima stresa betun da la cuvrida dal tunnel, scuvra il plaun dal tunnel e construescha suenter il fundament (banchet, via da servetsch, drenascha). Plinavant ventsch'ins las 12 colliaziuns traversalas tranter il tunnel vegl ed il nov. Suenter pon ins cumenzar cun la montascha dals binaris e l'encablament da la tecnica da viafier. Igl è previs da metter en funcziun il nov tunnel da l'Alvra la fin dal 2021 / il cumenzament dal 2022. Il tunnel existent ch'è collià cun il tunnel nov tras las 12 colliaziuns traversalas daventa in tunnel da segirezza.

Renovaziun da las staziuns da Preda e da Spinas

En coordinaziun cun il program da las construcziuns interiuras dal tunnel renovesch'ins las duas staziuns dal tunnel da l'Alvra. Ils onns 2020 e 2021 vegnan tant Preda sco era Spinas adattads al stadi actual da la tecnica ed als basegns da persunas cun impediments. A la staziun da Spinas vegn auzà e prolungà il perrun. Er il punct da cruschada vegn prolungà. La staziun da Preda survegn in terz binari, uschia ch'il manaschi da viafier per scarsoladers po vegnir reglà separadamain sin binari 1. Il manaschi normal ha lieu sin ils binaris 2 e 3 che survegnan in perrun d'amez accessibel grazia ad in sutpassadi. Tant il perrun da chasa sco er il perrun d'amez survegnan in tetg.