10.07.2017 – 38 pertschient dal traject dal tunnel èn perfurads

Las lavurs da perfuraziun a Preda ed a Spinas procedan constantamain. En il focus da la fasa da construcziun actuala stat ussa l'avanzament en la caverna da la vart da Preda. Davant il portal a Spinas vegn remplazzada la punt veglia dal Beverin.

2 200 meters dal nov tunnel da l'Alvra èn vegnids perfurads fin ussa. Quai correspunda a var 38 pertschient dal traject che ha ina lunghezza totala da 5 860 meters. L'avanzament a Preda è arrivà a la marca da 1 100 meters ed ils miniers han anc da surmuntar 90 meters fin ch'els cuntanschan la caverna. La colliaziun da l'avanzament dal tunnel a Preda cun la caverna duess succeder il settember 2017. Da la vart da Spinas èn ils miniers avanzads fin ussa 980 meters tras il granit dir da l'Alvra.

Nova punt a Spinas
Il medem mument cun las lavurs da siglientar a l'intern da la muntogna vegn remplazzada davant il portal a Spinas la punt veglia dal Beverin tras ina punt da betun e d'atschal da 18 meters lunghezza. Per betg impedir il traffic da viafier regular vegn la nova punt prefabritgada e montada en elements la notg durant las pausas da manaschi. L'entir process da construcziun è damai detg cumplex e succeda en etappas. La nova punt correspunda a las pretensiuns envers il traject dal patrimoni mundial da l'UNESCO.