12.09.2016 – Il di da las portas avertas sin il plazzal è stà in success

Sonda, ils 10 da settember 2016, han passa 1500 persunas visità ils plazzals dal nov tunnel da l'Alvra a Preda ed a Spinas. Ils puncts culminants èn stads la visita da las lavurs da perfuraziun e da la caverna al meter da tunnel 1300. A chaschun da l'act festiv uffizial cun giasts envidads è vegnì inaugurà tranter auter il cumpartiment giapunais en in dals novs trens a cumposiziun bloccada da l'Alvra en onur da la viafier schumellina Hakone Tozan Railway.

Entant che la sonda en damaun è stada reservada per las collavuraturas ed ils collavuraturs da la VR e per ils abitants datiers dal plazzal, èn arrivadas la sonda suentermezdi passa 1000 ulteriuras persunas a Preda e Spinas per visitar ils plazzals e la caverna al meter da tunnel 1300. En differents posts han las visitadras ed ils visitaders survegnì infurmaziuns detagliadas dals spezialists participads a la construcziun. Ils puncts culminants èn stadas las visitas en ils lieus da la perfuraziun ed en la caverna, nua che spetgava sco surpraisa in vagun cun ina glatscharia.

Act festiv cun delegaziun giapunaisa
Sur mezdi ha gì lieu a Preda l'act festiv sco tal cun giasts envidads. Il president dal cussegl d'administraziun da la VR, Stefan Engler, ed il directur da la VR, Renato Fasciati, han revelà ensemen cun ina delegaziun da la Hakone Tozan Railway il nov cumpartiment giapunais en in dals trens a cumposiziun bloccada da l'Alvra. Christian Florin, manader da l'infrastructura VR, ha moderà l'act festiv ch'è vegnì cumplettà cun il batten da la maschina da montar binaris «CAPRICORN» e la parada da tut las quatter novas locomotivas da diesel.