17.10.2017 – Emprima perfuraziun en il tunnel da l'Alvra
La perfuraziun en la caverna è in ulteriur term impurtant en la construcziun dal nov tunnel da l'Alvra da la Viafier retica (VR). Mardi, ils 17 d'october 2017, han ils miniers da l'avanzament da Preda perfurà ils ultims grips che separavan els da la caverna. Uss è surmuntada la zona la pli spinusa dal massiv muntagnard. Dapi l'entschatta da las lavurs da perfuraziun la fin d'avust 2015 èn vegnids perfurads bundant 50 pertschient dal traject dal tunnel cun ina lunghezza da totalmain 5 860 meters. La perfuraziun principala dal tunnel da l'Alvra vegn a succeder probablamain la fin d'atun 2018.
Curt avant mezdi han ils miniers da l'avanzament da Preda pudì surdar la statua da la patruna dals miniers, la sontga Barbara, a lur camarats da l'avanzament da Spinas. Cun la perfuraziun en la caverna è surmuntada la part la pli spinusa da l'avanzament per il nov tunnel: la zona da disturbi geologica «corniola da Raibl». Il directur da la VR, Renato Fasciati, ha cun questa chaschun undrà la prestaziun da tut las persunas participadas al project, ha engrazià ad ellas per il grond engaschi e giavischà cun il salid tradiziunal dals miniers «Glück auf!» bler success per il temp da construcziun restant.
Dumagnà bain las difficultads geologicas
Ils planisaders e realisaturs dal nov tunnel han fin qua gì da vegnir a frida cun in pèr nuschs diras en il massiv da l'Alvra. Sper il plattì da l'Allgäu che maina bler'aua è surtut la superaziun da la zona da disturbi «corniola da Raibl», che sa chatta al meter da tunnel 1300, stada ina gronda sfida. Per pudair construir in tunnel tras questa rasada labila è ella vegnida schelada sur plirs mais cun ina procedura cumplexa. Davent da la caverna, ch'ins ha construì aposta, è la corniola vegnida schelentada cun -15 grads durant var nov mais sin ina lunghezza da 60 meters ed in diameter da circa 17 meters. Protegida da quest panzer da glatsch ha la zona da disturbi d'ina grossezza da 20 meters pudì vegnir surmuntada. Suenter èn las paraids dal tunnel vegnidas stabilisadas cun in rintg da betun dad 1,20 meters grossezza. Quel isolescha l'arvieut cun pliras rasadas cunter la pressiun idraulica. Silsuenter han ins pudì allontanar ils indrizs da schelentar. Cun la perfuraziun da la vart da Preda vegn la caverna uss integrada en il nov tunnel. La perfuraziun principala dal tunnel da l'Alvra vegn a succeder probablamain la fin d'atun 2018.