25.10.2016 – Infoarena dal tunnel da l'Alvra survegn il German Design Award
L'Infoarena dal tunnel da l'Alvra da la Viafier retica (VR) è vegnida undrada cun il German Design Award 2017. La giuria internaziunala è sa laschada persvader da l'inscenaziun infurmativa ed originala dal plazzal per la construcziun nova dal tunnel da l'Alvra a Preda. Il German Design Award vala sco ina da las concurrenzas da design las pli renconuschidas en l'entir mund e giauda in'auta stima sur ils circuls d'experts ora.
Il German Design Award scuvra e preschenta trends da concepziun singulars. El undrescha products, projects e concepiders innovativs e decisivs per la cuntrada da design. En il catalog davart il German Design Award 2017 lauda la giuria internaziunala cun 48 commembers l'excellenta qualitad dal design ed il concept cumplessiv da l'Infoarena dal tunnel da l'Alvra. Quella «enzuglia» il plazzal alpin cun ina paraid cotschna da 165 meters lunghezza che represchenta la siluetta d'ina muntogna. Il medem mument è quella la saiv dal plazzal, in lieu d'infurmaziun ed in term. Il concept dal design da l'Infoarena dal tunnel da l'Alvra han elavurà ils dus ateliers «Erlebnisplan» a Lucerna e Frank Dittmann, atelier per scenografia ed architectura a Turitg. La surdada dals premis dal German Design Award 2017 ha lieu ils 10 da favrer 2017 a Francfurt.
L'Infoarena dal tunnel da l'Alvra attira blers visitaders
Roman Cathomas, il manader da project responsabel da l'Infoarena dal tunnel da l'Alvra tar la VR, ha grond plaschair da la distincziun: «La premiaziun da l'Infoarena dal tunnel da l'Alvra conferma nossas stentas d'inscenar eveniments e nossa auta pretensiun envers la qualitad ed il design. Ultra da quai èsi stà per nus fitg impurtant d'integrar l'Infoarena en ina moda consistenta en la situaziun da plazzal a Preda». La VR saja persvasa che la construcziun ed il turissem en la dretga cumbinaziun possian schizunt crear ina plivalur. Perquai sa stentia la VR adina da contemplar la gronda activitad da construcziun era cun ils egls dal giast e da sviluppar eveniments attractivs, explitgescha Cathomas. E quai vegn apparentamain er apprezià: malgrà che l'Infoarena dal tunnel da l'Alvra è accessibla mo in mez onn per motivs stagiunals, han dapi l'avertura il zercladur 2015 passa 6 000 persunas participà a las visitas guidadas offertas. Ed en general è l'Infoarena dal tunnel da l'Alvra daventada in lieu d'excursiun popular.
L'Infoarena dal tunnel da l'Alvra – in eveniment per pitschen e grond
L'Infoarena dal tunnel da l'Alvra a Preda documentescha durant il temp da construcziun il project grond «construcziun dal nov tunnel da l'Alvra». L'Infoarena è averta a partir dal matg enfin la fin d'october mintga di tranter las 8.00 e las 20.00. La visita è gratuita e succeda individualmain. I vegnan offertas era regularmain visitas guidadas tras il plazzal.
German Design Award
Il German Design Award undrescha products, projects e concepiders innovativs decisivs per la cuntrada da design. L'Infoarena dal tunnel da l'Alvra è vegnida undrada en la categoria «Urban Space» cun ina menziun speziala.