31.08.2015 - Nov tunnel da l'Alvra: la perfuraziun cumenza
Al portal nord dal tunnel da l'Alvra da la Viafier retica (VR) a Preda han cumenzà glindesdi, ils 31 d'avust 2015, las lavurs da perfuraziun per il nov tunnel da l'Alvra. Uschia pon ins cumenzar suenter lavurs preparatoricas intensivas che han durà 14 mais cun la construcziun dal tunnel per propi. Per la VR e las interpresas executivas è quai in term fitg impurtant. En preschientscha dal president dal cussegl d'administraziun da la VR Stefan Engler, collavuraturs da las medias e represchentants e lavurers da las interpresas incumbensadas cun la construcziun nova han ins cumenzà las lavurs da perfuraziun cun ina pitschna festa.
En il rom da la festa per las lavurs da perfuraziun inizialas dal tunnel ha il prer Kurt Benedikt Susak celebrà ina messa e benedì e postà ina statua da sontga Barbara, la patruna dals miniers. Hans Köhler, manader da la partiziun construcziun da tunnels da l'interpresa responsabla Porr Suisse, ed il president dal cussegl d'administraziun da la VR Stefan Engler han purtà lur salids als miniers preschents.
Il project va tenor urari
Dapi la badigliada la fin da zercladur 2014 han ins fatg vastas lavurs preparatoricas. L'access al plazzal succeda per gronda part cun il tren. Per quel intent han ins installà al portal nord ed al portal sid a Preda ed a Spinas staziuns da construcziun colliadas cun ils binaris. Il material che vegn sbuvà en il tunnel serva sco materia prima per producir betun e glera e vegn elavurà a partir da l'onn proxim a Preda. Per quel intent han ins installà in indriz per far betun, in plazzal da lavur ed indrizs da preparaziun da glera. Per crappa da qualitad insuffizienta per la reutilisar directamain han ins preparà en il territori «Las Piazzettas» dasper Preda in vallà adattà per depositar fin 250 000 m³ material da sbuvada. En il tunnel existent han ins endirì e segirà il revestgiment marod dal tunnel da crap natiral sco er engrondì la caverna tar il meter dal tunnel 1 300 per preparar la perfuraziun da la zona da disturbi geologica da corniola.
Infurmaziuns davart il nov tunnel da l'Alvra a Preda
Al portal nord dal tunnel da l'Alvra a Preda documentescha l'Infoarena il grond project e dat in'invista a las visitadras ed als visitaders en il mund da la construcziun da tunnels, e quai fin ch'il nov tunnel da l'Alvra è finì l'onn 2022. I vegnan era tematisadas la construcziun en il perimeter dal patrimoni mundial da l'UNESCO e las mesiras per proteger la flora e fauna. L'Infoarena è averta mintga di enfin la fin d'october. Ultra da la visita da l'Infoarena libra ed individuala dattan guids dal plazzal la pussaivladad da survegnir infurmaziuns pli specificas.