Actualitads

30.03.2021 - Otgavla stagiun da construcziun vi dal nov tunnel da l'Alvra

La realisaziun dal tunnel da l'Alvra cun ina lunghezza da 5860 meters tranter Preda e Spinas è en l'otgavla stagiun da construcziun. Era quest onn ha il manaschi da construcziun cuntinuà sin differentas plazzas da lavur e cun mesiras da COVID-19. Las lavurs da construcziun da tunnel vegnan exequidas mintga di da duas equipas e quai tschintg dis l'emna. Per motivs da segirtad ston las lavurs sur terra en il sectur dals implants da viafier mintgatant era vegnir exequidas da notg. 

02.10.2018 - Il nov tunnel da l'Avlra da l'Alvra da la Viafer retica

Mardi, ils 2 d'october 2018 è vegnì perfurà il nov tunnel da l'Alvra da la Viafier retica (VR). En bun trais onns han ils miniers rut ora nà da Preda e Spinas il tunnel da 5 860 meters tranter la Val d'Alvra e l'Engiadin'Ota. Ins ha uschia cuntanschì in dals terms impurtants dal project che custa 345 milliuns francs.

19.09.2018 - La perfuraziun s'avischina

Trais onns suenter il cumenzament da las lavurs da tunnel s'avischina la perfuraziun. Mardi, ils 2 d'october 2018, festivescha la Viafier retica en in act festiv – ensemen cun tut quels che han participà al project – la perfuraziun dal nov tunnel da l'Alvra.

10.07.2018 - L'avanzament cun siglientadas cuntinuescha bain

Entant èn sbuvads passa 4 900 da totalmain 5 860 meters dal nov tunnel da l'Alvra. Quai correspunda ad 83 pertschient da l'entira lunghezza. La perfuraziun è previsa l'atun 2018.

04.05.2018 - Passa 70% dal nov tunnel èn sbuvads

Las lavurs da perfuraziun dal nov tunnel da l'Alvra progredeschan bain. Entant èn sbuvads var 4 150 da totalmain 5 680 meters. La perfuraziun ha probablamain lieu l'atun 2018.

17.10.2017 – Emprima perfuraziun en il tunnel da l'Alvra

La perfuraziun en la caverna è in ulteriur term impurtant en la construcziun dal nov tunnel da l'Alvra da la Viafier retica (VR). Mardi, ils 17 d'october 2017, han ils miniers da l'avanzament da Preda perfurà ils ultims grips che separavan els da la caverna. Uss è surmuntada la zona la pli spinusa dal massiv muntagnard. 

10.07.2017 – 38 pertschient dal traject dal tunnel èn perfurads

Las lavurs da perfuraziun a Preda ed a Spinas procedan constantamain. En il focus da la fasa da construcziun actuala stat ussa l'avanzament en la caverna da la vart da Preda. Davant il portal a Spinas vegn remplazzada la punt veglia dal Beverin. 

01.03.2017 – Surmuntà cun success la zona da disturbi

La «muntogna flottanta» è surmuntada: la fin da schaner 2017 è vegnida perfurada la zona da disturbi «corniola da Raibl». La rasada da crappa consistenta d'aua e da glitta vegn uss isolada e segirada cun in rintg da betun cun ina grossezza da 60 centimeters. Sin ils plazzals a Preda ed a Spinas cumenzan il 1. da mars 2017 puspè las lavurs da perfuraziun. 

25.10.2016 – Infoarena dal tunnel da l'Alvra survegn il German Design Award

L'Infoarena dal tunnel da l'Alvra da la Viafier retica (VR) è vegnida undrada cun il German Design Award 2017. La giuria internaziunala è sa laschada persvader da l'inscenaziun infurmativa ed originala dal plazzal per la construcziun nova dal tunnel da l'Alvra a Preda. Il German Design Award vala sco ina da las concurrenzas da design las pli renconuschidas en l'entir mund e giauda in'auta stima sur ils circuls d'experts ora. 

12.09.2016 – Il di da las portas avertas sin il plazzal è stà in success

Sonda, ils 10 da settember 2016, han passa 1500 persunas visità ils plazzals dal nov tunnel da l'Alvra a Preda ed a Spinas. Ils puncts culminants èn stads la visita da las lavurs da perfuraziun e da la caverna al meter da tunnel 1300. A chaschun da l'act festiv uffizial cun giasts envidads è vegnì inaugurà tranter auter il cumpartiment giapunais en in dals novs trens a cumposiziun bloccada da l'Alvra en onur da la viafier schumellina Hakone Tozan Railway.

01.03.2016 - Represa da las lavurs da construcziun en il tunnel da l'Alvra

Il project dal nov tunnel da l'Alvra cumenza suenter la pausa d'enviern 2015/16 l'entschatta da mars 2016 gia la terza stagiun da construir. Suenter las lavurs preparatoricas dal 2014 e la construcziun da las installaziuns il 2015 vegn ussa focussada da nov la perfuraziun dal tunnel – inclus l'avanzament tras la zona da disturbi da corniola. Fin ussa han ins sbuvà 280 meters dal tunnel resp. 5% da la lunghezza totala dal tunnel.

28.01.2016 - Invista en la caverna

Entant che las lavurs da construcziun per il nov tunnel da l'Alvra èn per gronda part interruttas l'enviern a Preda ed a Spinas, vegn lavurà en la caverna mordio. Per stabilisar la zona da disturbi geologica da corniola per la perfuraziun dal tunnel vegnan fatgas tar il meter dal tunnel 1 300 lavurs preparatoricas vastas e cumplexas.

24.11.2015 - La perfuraziun dal tunnel è sin buna via

Dapi la festa da las lavurs da perfuraziun inizialas dal tunnel da l'Alvra la fin d'avust è sa midà bler sin il plazzal. Ils miniers, ils maisters siglientaders, ils poliers, euv. èn sa chasads en lur alloschis e sin ils plazzals a Preda ed a Spinas è in grond travasch curt avant la pausa d'enviern.

31.08.2015 - Nov tunnel da l'Alvra: la perfuraziun cumenza

Al portal nord dal tunnel da l'Alvra da la Viafier retica (VR) a Preda han cumenzà glindesdi, ils 31 d'avust 2015, las lavurs da perfuraziun per il nov tunnel da l'Alvra. Uschia pon ins cumenzar suenter lavurs preparatoricas intensivas che han durà 14 mais cun la construcziun dal tunnel per propi. Per la VR e las interpresas executivas è quai in term fitg impurtant. En preschientscha dal president dal cussegl d'administraziun da la VR Stefan Engler, collavuraturs da las medias e represchentants e lavurers da las interpresas incumbensadas cun la construcziun nova han ins cumenzà las lavurs da perfuraziun cun ina pitschna festa.

Deutsch / English / Italiano / Rumantsch Grischun

Zur Sprachauswahl

A la selezione lingue

To language selection

Tier la selecziun da linguatg