La segirezza en connex cun la construcziun nova dal tunnel da l'Alvra

La segirezza al plazzal

Al plazzal valan las prescripziuns da segirezza generalas per lavurers da construcziun. L'equipament da basa è l'equipament da protecziun persunal. Ina sfida speziala è il traffic da trens a las staziuns da construcziun, pia là, nua ch'il manaschi da viafier scuntra il manaschi da construcziun.

Las pli impurtantas reglas en connex cun lavurs sin l'areal da binaris èn:

• lavurar sulettamain cun equipament da segirezza

• passar sin l'areal da binaris mo, sch'igl è urgentamain necessari per motivs dal manaschi

• als posts da lavur èn endrizzads meds d'alarm acustics u optics

• las lavurs da construcziun sin l'areal da binaris vegnan survegliadas d'in guardian da segirezza, al qual igl è adina da dar suatientscha

La segirezza en connex cun la construcziun dal tunnel
In plazzal sut terra, quai vul dir en l'intern da la muntogna, signifitgescha dapli privels. Perquai vegnan prendidas numerusas mesiras per augmentar la segirezza da lavur en connex cun la construcziun dal nov tunnel da l'Alvra. L'equipament da protecziun obligatoric vegn per exempel cumplettà cun lampas ed apparats da respiraziun. La controlla d'access e da preschientscha dat scleriment davart las persunas che sa chattan en la zona da privel dal tunnel.

Pronts per il cas urgent
Grazia a gronds sforzs ed ina moda e maniera da proceder prudenta vegn reducida fermamain la ristga d'accident sin il plazzal. Tuttina pon eveniments betg previsibels chaschunar accidents cun persunas. En talas situaziuns d'excepziun vala in concept d'urgenza e da salvament che reglescha in spert salvament ed in provediment medicinal da las persunas pertutgadas.

Il concept d'urgenza e da salvament cumpiglia tranter auter ils suandants puncts:

Alarm

• Cun alarmar spert ed a moda clera vegn garantì in agid effizient e las mesiras d'urgenza che salvan la vita pon vegnir fatgas uschè spert sco pussaivel d'in medi.

Concept da salvament

• Al plazzal lavura persunal da professiun ch'è abel d'empruvar da stizzar las flommas en cas d'incendi e da dar emprim agid en cas d'in accident.

Dispositiv d'urgenza

• Las forzas d'intervenziun a Bravuogn ed a Samedan vegnan al lieu d'acziun cun vehichels bivials (via e rodaglias). A tuts dus portals dal tunnel vegn endrizzada ina plazza d'atterrament per helicopters per il salvament or da l'aria.

Communicaziun

• En cas d'urgenza sa concentreschan ils communicaturs sin las infurmaziuns las pli impurtantas. Ils lavurers al plazzal èn scolads correspundentamain e vegnan instruids regularmain davart sortidas d'urgenza e plazzas da rimnada.

Exercizis da salvament

• Per rinforzar il decurs e las enconuschientschas davart la segirezza da las persunas involvidas, vegnan organisads exercizis da salvament periodics.