Il plazzal
Nus construin per Vus al tunnel da l'Alvra. El renda accessibla l'Engiadina dapi passa 110 onns ed ha ussa plaunsieu cuntanschì la fin da ses temp da servetsch. Igl è stà necessari d'al sanar u d'al construir da nov. Suenter examinaziuns minuziusas da las duas variantas «renovaziun» e «construcziun nova» ha la Viafier retica decis l'onn 2010 da construir in nov tunnel a binari metric e da reutilisar il tunnel existent sco tunnel da segirezza. Ils motivs decisivs èn stads la differenza relativamain pitschna dals custs, las restricziuns minimas da l'urari ed il nivel da segirezza meglierà considerablamain.
Pervi dal nov tunnel da l'Alvra na vegn la capacitad da princip betg amplifitgada. Il traject tranter Spinas e Preda vegn er en futur ad avair mo in binari, pertge ch'i n'è betg da quintar a lung termin cun in'extensiun da l'urari. Perquai han ins desistì da construir en il tunnel ina chara lingia da viafier cun dus binaris. Il nov tunnel schlargia però il sistem da trajects da bloccada tranter Preda e Spinas. Ils trajects da bloccada èn definids; i vegn surveglià quants trens che entran e che sortan da quest traject. In tren po entrar en il traject da bloccada unicamain sche nagins auters vehichels sa chattan sin il traject. Il vegl tunnel da l'Alvra dispona d'in traject da bloccada mintgamai al portal al nord ed al sid. Fin ussa po damai mintgamai in tren ir tras il tunnel. En il nov tunnel da l'Alvra pussibilitescha in ulteriur traject da bloccada che cumenza en la mesadad dal tunnel da prest sis kilometers che dus trens che van en la medema direcziun pon sa chattar il medem mument en il tunnel.
Las finamiras da quest project dal tschientaner vegnan damai fixadas suandantamain:
-
in nov tunnel da viafier cun in binari parallel cun il tunnel da l'Alvra existent
-
transfurmaziun e renovaziun da las staziuns da Preda e da Spinas tenor ils basegns da persunas cun impediments
-
aut nivel da segirezza grazia ad ina sortida d'urgenza garantida cun colliaziuns traversalas tranter il nov tunnel ed il tunnel da segirezza
-
il manaschi viafieril na vegn betg disturbà da las lavurs da construcziun
-
durabilitad – il nov tunnel duai puspè restar 100 onns en servetsch
-
la construcziun correspunda a las autas pretensiuns dal conturn alpin ed è confurm a las exigenzas da l'UNESCO
En pli prevesa il concept da manaschi dal nov tunnel las suandantas valurs directivas:
|
Sveltezza dals trens max. |
|
|
120km/h |
|
Frequenza da trens |
|
|
tenor urari – senza trens spezials e da servetsch: 45 trens da persunas e da martganzia a di |
|
Pausa da notg |
|
|
Da las 22.30 fin las 5.00 na van nagins trens tras il tunnel. Durant quest temp pon vegnir fatgas lavurs da mantegniment ordinarias. |
Finanziaziun
Garantir ils basegns da mobilitad da la populaziun svizra – independentamain da la regiun – tutga tar il provediment da basa delegà a la Confederaziun. La finanziaziun dal nov tunnel da l'Alvra che custa var 345.5 milliuns francs svizzers surpiglia cumplainamain la Confederaziun ed il Chantun.
La Viafier retica engrazia a la Confederaziun ed al chantun Grischun per il sustegn finanzial!
|
Construcziun dal tunnel/construcziun brutta |
|
|
61.2 % |
||
|
Tecnica viafierila |
|
|
5.1 % |
||
|
Indrizs da manaschi e da segirezza |
|
|
1.4 % |
||
|
Indrizs electrics |
|
|
6.1 % |
||
|
Projectaziun, planisaziun, custs accessorics da la direcziun da construcziun |
|
|
12.8 % |
||
|
Custs imprevis |
|
|
8.7 % |
||
|
Chareschia |
|
|
4.7 % |
||
|
Total custs d'investiziun |
|
|
345.5 milliuns francs |
Ulteriuras infurmaziuns davart ils differents temas e secturs dal plazzal chattais Vus en ils texts sutvart.
