Lavurar sin il plazzal da la construcziun nova dal tunnel da l'Alvra

Numerus collavuraturs da la viafier lavuran sin il plazzal. Els èn per l'ina responsabels per il traffic da viafier sin il plazzal e per l'autra per in manaschi da viafier segir e punctual tras il nov tunnel da l'Alvra. Entant ch'ils collavuraturs da la viafier s'occupan dal transport da martganzia, da la gestiun da numerus trens da construcziun e da l'installaziun dals indrizs da viafier, èn ils lavurers da construcziun responsabels per la construcziun d'in tunnel che duai servir a pliras generaziun. Per la construcziun nova dal tunnel da l'Alvra lavuran els di e notg e quai en ed enturn il tunnel.

Professiuns tar la viafier

Logisticher/logisticra AFQ (accumpagnader/accumpagnadra da manevrar)
En il traffic lavuran logistichers/logisticras AFP oravant tut sin las staziuns ed en ils deposits. En il servetsch da manevrar accupleschan e decupleschan els trens. Cun funcs e tschivlots communitgeschan els cun locomotivists e locomotivistas. Plinavant lavuran els en il deposit ed al spurtegl da bagascha ed èn responsabels per la logistica da bagascha e da martganzia.

Lavurs al plazzal da la construcziun nova dal tunnel da l'Alvra

• furmar trens da construcziun e da vitgira che transportan material e calcular lur temp da franar

• accumpagnar trens da construcziun

• manevrar a las staziuns da construcziun

Montader/montadra da binaris AFQ
Montaders/montadras da binaris èn da viadi sin la rait da viafier svizra e s'occupan da la construcziun e dal mantegniment da binaris. Els monteschan e tgiran binaris e sviaders, controlleschan ils trajects e fan lavurs da reparatura. Per il binari fan els lavurs da fundament, dreneschan il terren e mettan lingias industrialas. Grazia a lur lavur è la rait da viafier en in stadi excellent e segir.

Lavurs al plazzal da la construcziun nova dal tunnel da l'Alvra

• demontar ils binaris en il vegl tunnel da l'Alvra

• montar ils binaris en il nov tunnel da l'Alvra

• installar cumponentas da regulaziun e da segiranza (p.ex. trajects da bloccada)

• construir ils binaris da las staziuns da construcziun a Preda e Spinas che servan al transport da material da construcziun

• segirar il plazzal, installar signals da viadi e da fermada

Electricist/electricista da rait AFQ
Lingias electricas èn las avainas essenzialas dal traffic public. Senza forza electrica stattan airi ils trens da persunas e da vitgira. Electricists/electricistas AFQ cun l'accent lingias electricas procuran per trens rudlants. Els utiliseschan palancas idraulicas u cranas. Per betg impedir il traffic public vegnan questas lavurs savens fatgas durant uras marginalas u la notg.


Lavurs al plazzal da la construcziun nova dal tunnel da l'Alvra

• montar ils stabiliments da lingias da contact (tranter auter binaris cun current electric al plafond) en il nov tunnel da l'Alvra

• demontar las lingias da contact dal vegl tunnel da l'Alvra

• mantegnair ils stabiliments da lingias da contact

Locomotivist/locomotivista
Locomotivists/locomotivistas manevreschan locomotivas electricas e locomotivas a diesel sin tscherts tschancuns da la rait da viafier. Els èn responsabels per ils passagiers e la martganzia che vegn transportada, per il material rudlant e per in viadi segir e punctual. Prescripziuns ed enconuschientschas dals signals èn la basa per ch'ils trens circuleschian cun la dretga sveltezza e tenor l'urari. Sin retards e disturbis tecnics vali da reagir cun sang fraid. Avant che partir examineschan ils locomotivists/las locomotivistas ils indrizs da surveglianza tecnics, ils indrizs da viadi e da franar da l'entir tren.


Lavurs al plazzal da la construcziun nova dal tunnel da l'Alvra

• manevrar a las staziuns da construcziun

• manischar il sprinter da l'Alvra da Preda a Spinas e viceversa

• far viadis da furniziun cun ils ulteriurs trens da vitgira da l'Alvra

Professiuns da construcziun

Manischunz/manischunza da maschinas da construcziun
Manischunzs/manischunzas da maschinas da construcziun lavuran sin plazzals da la construcziun auta e bassa e da la construcziun da vias da traffic. Els manevreschan a moda professiunala maschinas da construcziun ed observan las prescripziuns da segirezza. Els fan part da las preparaziuns da construcziun e fan lavurs da controlla e da mantegniment.

Lavurs al plazzal da la construcziun nova dal tunnel da l'Alvra

• da l'exchavatur ed il cupitgader fin al chargiader sin rodas: manevrar maschinas da construcziun per part fitg grondas che vegnan utilisadas per deplazzar bains da massa sco per exempel material da sbuvada, betun e glera

• mantegnair las maschinas da construcziun e far pitschnas lavurs da reparatura

• controllar las maschinas da construcziun per percorscher ad uras mancos

Miradur/miradura
Miradurs/miraduras lavuran sin plazzals da la construcziun auta e bassa. En la construcziun auta vegnan en emprima lingia construids edifizis: chasas, centers da cumpras, scolas u edifizis industrials. Da la construcziun bassa fan part punts, tunnels, sistems da chanalisaziun u indrizs d'infrastructura sco per exempel sereneras u la rait da viafier. Tar il champ da lavur d'in miradur tutgan era lavurs da mantegniment, da sanaziun e da restauraziun. Las incumbensas èn multifaras e pretensiusas e vegnan exequidas cun metodas dal mastergn tradiziunalas e maschinas ed apparats moderns.

Lavurs al plazzal da la construcziun nova dal tunnel da l'Alvra

• far lavurs da mantegniment en il vegl tunnel da l'Alvra (sanar il revestgiment dal tunnel)

• far il revestgiment dals portals dal nov tunnel da l'Alvra

• revestgir l'intern dal nov tunnel da l'Alvra

• metter lingias industrialas en il nov tunnel da l'Alvra

• sustegnair il team d'installar il plazzal, las maschinas da construcziun ed ils apparats, empustar il material, e.u.v.

Maister siglientader/maistra siglientadra (minier/miniera)
Siglientadas servan a plirs intents: en la construcziun auta e bassa vegnan fatgas siglientadas d'erosiun, siglientadas da foss e siglientadas d'edifizis. En la construcziun sut terra vegnan siglientadas galarias, tunnels, cavernas e foss. Era siglientadas da segirezza da grips instabils e siglientadas sut l'aua tutgan tar il mintgadi da spezialists siglientaders.
Maisters siglientaders/maistras siglientadras èn responsabels per ina realisaziun segira da las lavurs da siglientada. Quai pretenda in grond senn da responsabladad. Chargias explosivas dastgan perquai vegnir preparadas ed envidadas sulettamain da persunas che possedan ina legitimaziun da siglientar correspundenta.

Lavurs al plazzal da la construcziun nova dal tunnel da l'Alvra

• inspectar il lieu da siglientada ed il conturn, elavurar plans da siglientar cun il basegn da meds da siglientar e da material

• planisar l'engaschament da persunal e da maschinas ed il transport da meds da siglientar

• elavurar il dispositiv da segirezza per la realisaziun da la siglientada

• manar las lavurs da sondagi sin ils posts da siglientar en il tunnel, survegliar l'installaziun dal material explosiv e da l'envidader en las foras da sondagi

• segirar l'areal da siglientada

• en cas da basegn mesirar las vibraziuns durant la siglientada

• controllar ils arvieuts en il vegl tunnel suenter la siglientada

• organisar il transport dal material siglientà

Mecanist/mecanista
Ils mecanists/las mecanistas da maschinas da construcziun tgiran e reparan maschinas, vehichels ed apparats che vegnan utilisads en la construcziun auta e bassa. Els fan lavurs da service, transfurman maschinas e produceschan tocs da reserva. En cas da reparaturas na san els betg mo co prender per mauns la chaussa, mabain erueschan cun apparats dirigids dal computer disturbis en ils sistems electrics, electronics, mecanics ed idraulics.

Lavurs al plazzal da la construcziun nova dal tunnel da l'Alvra

• mantegnair, tgirar e reparar maschinas da construcziun

• preparar novas maschinas per metter en funcziun, controllar e mesirar valurs da svapur e da l'emissiun da canera

• mantegnair e tgirar ils indrizs da spulvrar e da transport, ventilaziuns, e.u.v.