Il pli impurtant en in'egliada – las cifras ed ils fatgs

Dapi il 1889 fa la Viafier retica part dal Grischun. Ina da las pli bellas cuntradas da la Svizra na pon ins betg s'imaginar pli senza la viafier da renum mundial. L'idea iniziala da construir la lingia da viafier ha gì in Ollandais: a Willem-Jan Holsboer èsi d'engraziar ch'ils piuniers da viafier grischuns han realisà l'onn 1888 lur visiun d'ina viafier da muntogna ed han fundà la viafier a binaris stretgs Landquart-Tavau SA. Anc il medem onn è succedida l'emprima badigliada. Quai che ha cumenzà il 1889 cun l'avertura dal traject Landquart – Claustra, è oz ina rait da lingias da 384 kilometers lunghezza amez las autas muntognas da la Svizra. La viafier collia vischnancas cun citads, il nord cun il sid sco era valladas lontanas cun destinaziuns turisticas pulsantas ed è l'avaina da vita sociala, economica e turistica dal chantun Grischun.

Integradas armonicamain en la natira selvadia, contribueschan las lingias da viafier e las construcziuns d'art al scharm dal Grischun. Las lingias da l'Alvra e dal Bernina tranter Tusaun, San Murezzan e Tirano èn capodovras da la tecnica da viafier e fascineschan ils viagiaturs da l'entir mund. Dapi il 2008 fan ellas part dal Patrimoni mundial da l'UNESCO.  Cun ils classichers Bernina Express e Glacier Express dispona la Viafier retica da marcas enconuschentas en l'entir mund.

Las pli impurtantas cifras

• 12'000'000 giasts viagian mintg'onn cun la Viafier retica

• 19'042 meters lung è il pli lung tunnel (Veraina)

• 1'500 collavuraturas e collavuraturs procuran per viadis fascinants

• 100 pertschient forza idraulica grischuna muventa ils trens electrics da la Viafier retica

• 70 ‰ importa la pli gronda pendenza (lingia dal Bernina)

• 30 pertschient dal traject da la Viafier retica sa chattan sur 1 500 m s.m.

• 30 pertschient dal traject da la Viafier retica fan part dal Patrimoni mundial da l'UNESCO

• 20 pertschient dal traject da la Viafier retica sa chattan sin u en construcziuns d'art (punts/tunnels)

En viadi sin binaris stretgs: la rait da lingias
La Viafier retica dispona d'ina rait da lingias efficazia da 384 kilometers lunghezza. Ella sa ferma en 103 lieus ch'èn colliads in cun l'auter tras diesch lingias regularas. L'emprima lingia è vegnida averta il 1889. Gia in onn suenter èn ils emprims trens circulads a Tavau, pli tard a San Murezzan, Mustér e Scuol. Tras la fusiun cun la viafier d'Arosa e la viafier dal Bernina il 1942 resp. il 1943 è la rait da lingias da la Viafier retica anc ina giada s'augmentada a moda rasanta. L'ultima giada è la rait vegnida engrondida il 1999 cun il tunnel dal Veraina.
La rait da lingias da la Viafier retica vala sco exempel excellent e tecnicamain innovativ per l'avertura da cuntradas autalpinas. In punct culminant per la Viafier retica è stà il 2008, cura ch'il traject da Tusaun fin Tirano è vegnì recepì en la glista dal Patrimoni mundial da l'UNESCO.

L'istorgia da la rait da lingias