Fascinescha dapi il 1889: la Viafier retica
Dapi il 1889 fa la Viafier retica part dal Grischun. Dapi quel onn na pon ins betg pli imaginar ina da las pli bellas cuntradas da la Svizra senza questa viafier da renum mundial. Integrada armonicamain en la natira selvadia, collia ella ils pli bels lieus dal territori alpin cun lingias da viafier impressiunantas e fascinescha, grazia a sias numerusas fassettas, sco strusch in'autra viafier.
Grazia a sias numerusas fassettas è la Viafier retica daventada quai ch'ella è oz: in'interpresa da transport moderna e multifara che represchenta l'avaina da vita sociala, economica e turistica d'ina entira regiun.
Sco viafier da pendularis transporta la Viafier retica mintga di millis da passagiers da lur lieus da domicil en ils centers da Cuira, Landquart, Tavau, San Murezzan e puspè a chasa. Ella è ina pitga impurtanta dal turissem ed accumpogna di per di tschients da turists da la Svizra e da l'exteriur en ils pli bels lieus dal chantun muntagnard. Sco viafier da vitgira efficazia è ella ina ferma partenaria da l'economia grischuna e sco via rullanta tras il tunnel dal Veraina procura ella per la suletta colliaziun segira d'enviern dal Grischun dal Nord en l'Engiadina. La Viafier retica è ina da las pli grondas patrunas dal Grischun: 1500 collavuraturas e collavuraturs fan 365 dis ad onn tut il pussaivel per ch'ils trens curseschian senza incaps sin la rait da viafier che mesira 384 kilometers.
