La vischnanca da pass: Bravuogn
Las perditgas dal temp da l'istorgia dal commerzi èn omnipreschentas a Bravuogn. La vischnanca n'è betg mo interessanta dal punct da vista da la cultura, mabain era da la cuntrada. Dapi il 2008 fa Bravuogn part da la cuntrada cultivada dal patrimoni mundial da l'UNESCO.
Bravuogn sa chatta amez il chantun Grischun, en il center da la Val d'Alvra. La vischnanca situada sin 1'400 m s.m. ha ina surfatscha da circa 146 kilometers quadrat e dumbra var 480 abitants repartids sin las quatter parts Bravuogn, Latsch, Preda e Stugl.
La vischnanca sa chatta al pe dal Piz Ela, l'emprestanum dal «Parc Ela» – il pli grond parc natiral da la Svizra. En pli cumenza qua il Pass da l'Alvra, il pli bel pass che maina la stad en l'Engiadina. Dapi il fanadur 2008 fa Bravuogn part da la cuntrada cultivada per lung dal traject da la Viafier retica che fa part dal Patrimoni mundial da l'UNESCO Viafier retica. Quel va da Tusaun sur San Murezzan fin a Tirano. Ma betg mo la cuntrada fa impressiun, mabain era la substanza architectonica istorica: il center dal vitg da Bravuogn cun chasas engiadinaisas pittorescas, decoradas ritgamain cun sgrafits, frescos ed erculs sco er ina baselgia romana dad 800 onns e la tur romana che surprenda cun sia omogenitad. Era Latsch è architectonicamain fitg serrà ed autentic e vala sco vitg muntagnard il pli originar en la Val d'Alvra.
