Il conturn dal tunnel: la regiun
Il tunnel da l'Alvra, la lingia da l'Alvra – tuts dus capodovras da la tecnica d'inschigneria. Ma era la regiun enturn il tunnel da l'Alvra para d'esser vegnida creada d'in pictur artist: d'ina vart criva e selvadia, da l'autra miaivla e quieta – igl è in gieu da cuntradicziuns, inscenà a moda virtuusa da mamma terra.
Chavorgias selvadias, guauds da schembers mirveglius, valladas miaivlas e vitgs pittorescs – la regiun en il conturn dal tunnel da l'Alvra fascinescha cun cuntradas impressiunantas ed originalitad.
Da la vart dal portal en il sid porscha la Val Bever ina culissa fantastica, in paradis per persunas che tschertgan la quietezza e per amaturs da la natira. Tuts dus na vegnan dentant betg mo a lur quint en la Val Bever – i vala la paina da visitar l'entira regiun da vacanzas Engiadina San Murezzan. Al portal en il nord dal tunnel sa chatt'ins amez la Val d'Alvra. Ultra da l'istorgia da viafier da passa 100 onns e construcziuns da viafier impressiunantas porscha ella er anc bler auter: la regiun da vacanzas Bravuogn Filisur è fitg populara tar pitschen e grond, fertant ch'il parc natiral Parc Ela carmala ils visitaders cun excursiuns, turas e bleras autras purschidas da scuvrir las pli bellas varts da la regiun.
