Top of the World: Engiadina San Murezzan
Ella è da renum mundial e vala sco lieu da scuntrada dals ritgs e bels. La regiun da vacanzas Engiadina San Murezzan è dentant era fitg stimada d'amaturs da la natira e da sportists passiunads. Ella porscha numerusas pussaivladads per aventuras e divertiment en las muntognas.
Las muntognas en l'Engiadin'Ota èn lunsch sur 3'000 meters autas. Sin lur flancas creschan guauds da schembers e lareschs e la planira da lais als pes da las muntognas traglischa en il sulegl. En l'Engiadina gioga cleramain la natira la rolla principala ed il sulegl è ses confederà. La vallada alpina carmala l'entir onn cun sulegl. I n'è betg surprendent che Engiadina San Murezzan vala sco ina da las pli bellas regiuns da vacanzas en Svizra. Ils 13 lieus da vacanzas na pudessan betg esser pli variants. Entant che l'entir mund è da chasa a San Murezzan e festivescha il glamour, tgir'ins en ils vitgs la tradiziun champestra: cun chasas restauradas cun premura, centers dals vitgs intacts e locals patgifics.
Sia impurtanza sco lieu da cura engrazia Engiadina San Murezzan oriundamain a sias funtaunas mineralas ch'èn enconuschentas dapi passa 3'000 onns. Ellas han etablì il lieu gia baud sco destinaziun da stad. Oz vala San Murezzan grazia a sia paletta da divertiment en ils secturs natira, cultura, sport, lifestyle, giudiment e recreaziun sco numer in da las destinaziuns da vacanzas en las muntognas en tut il mund ed attira tant jetsetters sco er amaturs d'activitads outdoor.
In paradis per sportists passiunads
Engiadina San Murezzan vala sco tgina dal turissem d'enviern. La legenda di ch'il turissem d'enviern derivia d'ina scumessa l'onn 1864 da Johannes Badrutt, in hotelier da San Murezzan. Cumenzond en in pitschen stil cun insaquants giasts englais è Engiadina San Murezzan spert sa sviluppà ad ina destinaziun d'enviern populara. Oz vala la regiun sin l'entir mund sco la chapitala dals lieus da vacanzas d'enviern exquisits. A sportists d'enviern stattan a disposiziun en il conturn 350 kilometers pistas da skis, 200 kilometers loipas da passlung e 150 kilometers sendas d'enviern. Quels che n'han anc betg avunda action vegnan a lur quint cun far snowkiting sin ils lais schelads, glischnar sin il glatsch natiral da la bobera giu u raiver en la chavorgia da glatsch.
La stad carmala Engiadina San Murezzan cun spir divertiment outdoor: 580 kilometers sendas da viandar envidan da spassegiar, da viandar e da far turas. Per munts e vals vai fin sin 4'049 meters – en spezial per alpinists è il Piz Bernina in must! Per quels che han pli gugent carauns che muntognas datti 400 kilometers sendas da mountainbike e rutas marcadas che mainan en crusch ed en travers tras il mund alpin engiadinais. En crusch ed en travers sur l'aua pon ins ir sin il Lai da Silvaplauna: grazia al vent da Malögia legendar è el in vaira paradis per surfists.
