Pitschnin ma bellin: la regiun da vacanzas Bravuogn Filisur
Bravuogn Filisur è ina pitschna regiun da vacanzas originara amez la Val d'Alvra. Ella porscha recreaziun spira, ma pussibilitescha er a sportists ed ad aventuriers vacanzas perfetgas.
A Bravuogn Filisur sa chatta il viaduct da la Landwasser da renum mundial. El è la part centrala da la lingia da l'Alvra renumada da la Viafier retica e tutga tar il Patrimoni mundial da l'UNESCO. La Val d'Alvra selvadia, tras la quala cula 'Alvra, fascinescha cun ina maschaida singulara da cuntradas crivas d'autas muntognas, chavorgias impressiunantas e funds da la val d'in verd intensiv. Da la natira enturn las duas vischnancas s'allegran tant sportists sco era persunas che tschertgan la quietezza. La cuntrada dal Patrimoni mundial da l'UNESCO è in paradis per scuvriders.
Attractiv la stad e l'enviern
Bravuogn Filisur è enconuschent lunsch enturn per sias pussaivladads da scarsolar. Las vias da scarsolar Preda-Bravuogn e Darlux-Bravuogn èn in uschè grond plaschair per giasts da tut il mund ch'els numnan il territori da sport da naiv al Pass da l'Alvra plain affecziun il «Mecca dals scarsoladers». Betg mo ils amis dals dus schlusigls vegnan tar il lur. Sin il Piz Darlux datti in pitschen paradis da skis e da snowboard che fa dependent. Per tut quels che vulan l'emprim empruvar ora las pistas en la val è adattà il territori da skis Tect/Zinols a Bravuogn cun ses paradis da skis per uffants gist sper il vitg. Grazia a sendas d'enviern preparadas bain, ina loipa per passlunghists, ina patinera natirala ed il bogn termal Alvagni n'ha la lungurella nagina schanza. E sch'il lontan attira tuttina ina giada ils giasts, vegni cler, quant central che Bravuogn Filisur è situà: Tavau, Lai e l'Engiadina èn quasi davant isch-chasa.
La stad è Bravuogn Filisur il punct da partenza ideal per numerusas turas. In highlight tut spezial en la regiun è il «Kesch-Trek». En viadi amez il mund alpin grischun lascha il giast enavos il mintgadi en la val. Tranter il Pass dal Flüela ed il Pass da l'Alvra scuvra el il mund quiet e spectacular da l'auta muntogna durant ina tura da quatter dis. L'alternativa: aventuras cun il tren. Quel maina da Preda a Bravuogn e vinavant a Filisur, direct sper las construcziuns d'art da la Viafier retica ora, ina part dal traject che tutga tar il Patrimoni mundial da l'UNESCO. La tura empermetta vistas unicas e pel-giaglina. Per tut quels che vulan vegnir a savair dapli da la construcziun da viafiers e da la Viafier retica è il Museum da viafier Alvra il dretg lieu. Era per ils giasts che s'interessan per la cultura datti differentas purschidas en la regiun – saja quai concerts d'artists indigens u d'interprets internaziunals, fieras dal vitg tradiziunalas u represchentaziuns da teater, var 40 differentas occurrenzas spetgan ils giasts.
