01.03.2016 - Represa da las lavurs da construcziun en il tunnel da l'Alvra
Il project dal nov tunnel da l'Alvra cumenza suenter la pausa d'enviern 2015/16 l'entschatta da mars 2016 gia la terza stagiun da construir. Suenter las lavurs preparatoricas dal 2014 e la construcziun da las installaziuns il 2015 vegn ussa focussada da nov la perfuraziun dal tunnel – inclus l'avanzament tras la zona da disturbi da corniola. Fin ussa han ins sbuvà 280 meters dal tunnel resp. 5% da la lunghezza totala dal tunnel.
Durant il manaschi d'enviern 2015/16 han ins fatg sin ils plazzals a Spinas e Preda cunzunt lavurs da mantegniment vid ils indrizs ed ils apparats e montà, sco preparativa per il manaschi da construcziun 2016, ulteriuras installaziuns sco indrizs da tschintas da transport, rumpacrappas e l'indriz per far betun. Il 1. da mars 2016 han ins puspè pudì cuntinuar tenor plan cun la perfuraziun dal tunnel. Da vart da Preda siglient'ins il tunnel fin che cumenza la corniola, a Spinas cuntinuesch'ins a sbuvar la crappa lucca.
En la caverna tar il meter dal tunnel 1 300 han ins lavurà nuninterruttamain era l'enviern. Per ch'ins possia perfurar senza privel la corniola, schelent'ins la furmaziun da lozza che mesira var 100 m. Las lavurs da furar e d'injectar necessarias èn en la fasa finala e vegnan terminadas la fin da mars. Suenter cuntinuesch'ins senza interrupziun cun la segunda fasa – l'«englatschament».
