28.01.2016 - Invista en la caverna
Entant che las lavurs da construcziun per il nov tunnel da l'Alvra èn per gronda part interruttas l'enviern a Preda ed a Spinas, vegn lavurà en la caverna mordio. Per stabilisar la zona da disturbi geologica da corniola per la perfuraziun dal tunnel vegnan fatgas tar il meter dal tunnel 1 300 lavurs preparatoricas vastas e cumplexas.
Per ch'ins possia perfurar senza privel la corniola, schelent'ins la massa da lozza durant plirs mais. Per quel intent fan ins var 120 sondagis da schelentar. Enturn il tagl traversal dal tunnel effectiv foran ils miniers cun taraders da sondagi spezials en ina distanza media dad in meter foras che tanschan 60 meters en il culm. Ellas penetreschan trais differentas sorts da crap. En las foras da sondagi postesch'ins lantschas da schelentar che pon vegnir sfradentas cun generaturs fin minus 15°C. A partir da l'avrigl cumenza il process da schelentar, per ch'ins possia cumenzar l'atun a perfurar la corniola. Apaina che la zona da disturbi è superada e las paraids dal tunnel èn stabilisadas e cuvridas cun betun injectà, sclaud'ins ils generaturs ed il crap sdreglienta puspè.
Ordaifer il tunnel fan ins actualmain lavurs d'installaziun pli pitschnas per la represa da la perfuraziun dal tunnel il mars.
