24.11.2015 - La perfuraziun dal tunnel è sin buna via
Dapi la festa da las lavurs da perfuraziun inizialas dal tunnel da l'Alvra la fin d'avust è sa midà bler sin il plazzal. Ils miniers, ils maisters siglientaders, ils poliers, euv. èn sa chasads en lur alloschis e sin ils plazzals a Preda ed a Spinas è in grond travasch curt avant la pausa d'enviern.
La fin d'avust han ins pudì cumenzar a Preda ed a Spinas cun la perfuraziun dal tunnel. Da vart da Preda han ins gia superà il traject cun crappa lucca e dapi mez october siglient'ins mintga di plirs meters plattì da l'Allgäu. Ins è prest a fin cun installar ils indrizs da tschintas da transport e l'indriz da preparaziun da glera. Ins trametta gia trais giadas l'emna trens cun glera e cement a Preda a la staziun da construcziun per proveder il plazzal cun las materias primas ed ils materials da construcziun necessaris. Cunquai ch'il traject cun crappa lucca a Spinas è var 200 meters lung, pon ins cumenzar da questa vart pir l'auter onn a siglientar il tunnel. Actualmain (stadi dals 24-11-2015) importa la perfuraziun dal tunnel da vart da Preda 180 meters e da vart da Spinas 55 meters. A partir da mez december fa il plazzal, cun excepziun da las lavurs en la caverna, ina pausa d'enviern da trais mais.
Caverna
La caverna tar il meter dal tunnel 1 300 han ins engrondì per il dubel per vegnir pli datiers da la zona da disturbi geologica da corniola e per installar optimalmain las mesiras da construcziun auxiliaras per schelentar questa zona da disturbi. Actualmain foran ils miniers en il culm ils sondagis per ils bischens da schelentar. Questas lavurs cuntinueschan tut l'enviern cun excepziun da las vacanzas da Nadal ed èn grazia a la lavur en trais squadras durant set dis l'emna gia en l'ultima fasa. L'avrigl 2016 pon ins alura cumenzar a schelentar il grip.
