Ils lavurers – Senza els na va nagut
A la construcziun dal tunnel da l'Alvra dal 1898 fin il 1903 èn stads participads passa 1'300 umens. Passa 110 onns pli tard è la tecnica sa sviluppada vinavant talmain che mintgamai mo 50 fin 80 lavurers lavuran da la vart da Preda e da Spinas.
Quatter teams a tschintg lavurers per vart fan lavur en squadras da 24 uras. In team consista mintgamai da:
1 manader dal team
2 miniers
2 maschinists
Cunquai che tut ils lavurers han la savida e las qualificaziuns per executar mintga funcziun, per tgirar a moda cumpetenta las maschinas e per duvrar a moda segira il material explosiv, pon las lavurs vegnir distribuidas individualmain entaifer in team.
Sin il plazzal èn plinavant ulteriurs spezialists ed experts necessaris. Quels èn tranter auter responsabels per las suandantas lavurs:
-
mantegnair e reparar ils vehichels
-
tgirar las tschintas da transport
-
preparar las maschaidas da betun
-
far analisas da laboratori dal material da sbuvada
-
far lavurs administrativas
-
manar la deponia
-
ed anc bler auter
Ils lavurers dorman da la vart da Preda en in vitg da containers endrizzà spezialmain per els. Mintga lavurer ha il dretg dad in'atgna chombra. Er en quest sectur è sa midà bler dapi la construcziun da l'emprim tunnel da l'Alvra. Pli baud stuevan ils lavurers da construcziun che faschevan lavurs en squadras per part parter in letg en l'alloschi da massa.
Sper in local da cuminanza han ils lavurers er a disposiziun oz ina cantina che ha avert 23 uras a di e che s'orientescha a la lavur en squadras.
