La patruna dals miniers e dals construiders da tunnels
Sin numerus plazzals da tunnel en tut il mund vala sontga Barbara sco la patruna dals miniers e protectura cunter disgrazias en la galaria. Ella è ina figura feminina cristian tempriva dal temp roman che ha subì il martiri per sia persvasiun. Mintgamai ils 4 da december sa regordan dad ella miniers, però era artigliarists, geologs, maisters siglientaders e bleras autras gruppas professiunalas.
La legenda
I dat numerusas versiuns da la legenda da sontga Barbara. La legenda da la sontga che deriva da la Legenda aurea (1250) vala sco la pli renumada e la pli derasada: Barbara è ina dunna giuvna che viva la fin dal 3. tschientaner a Nikomedia. Ses bab pajaun Dioskorus la vul proteger da tut ils contacts cun il mund, betg il davos per refusar ad ella las influenzas dal Cristianissem. Durant sia absenza serra el perquai mintgamai en Barbara en ina tur. Barbara chatta però tuttina la via a la cardientscha cristiana e sa lascha battegiar clandestinamain. Cura ch'ella palaisa quai in di a ses bab, tira quel plain gritta la spada per la mazzar. Barbara, profundada en uraziun, vegn però traguttida d'in crap che sa sfenda e messa sin in culm. Ses bab la chatta tuttina e la torturescha per scungirar la cardientscha cristiana da ses spiert. Barbara resta però stataivla, malgrà ils pli grevs maltractaments. En praschun cumpara ad ella quella notg Cristus che guarescha sias plajas. L'auter di, ils 4 da december, mazza ses bab ella. Per chasti vegn quel sturnì anc quel di dal chametg.
Patruna dals construiders da tunnels
Perquai che Barbara è vegnida protegida tenor la legenda d'in crap ch'è s'avert e l'ha zuppà, han ils miniers elegì ella sco lur patruna. Ins ha perquai endrizzà en bleras minieras reliquiaris sut terra che mussan la sontga Barbara. In reliquiari da sontga Barbara è era plazzà al portal dal tunnel a Preda e duai dar curaschi e segirtad als lavurers che entran en il tunnel.
