Segirezza sin il pli aut nivel!

Il tunnel da segirezza
Suenter ch'il nov tunnel da l'Alvra è avert, vegn il tunnel existent serrà per il traffic da trens e transfurmà en il tunnel da segirezza menziunà. Per realisar quai èn previsas las suandantas mesiras:

• allontanar tut ils indrizs tecnics da la viafier inclus ils cabels;

• reparar parzialmain il mir donnegià e segirar las parts dal grip balluccantas;

• remplazzar la drenascha dal tunnel;

• allontanar ils binaris e catramar la via;

• metter ina lingia cun aua da stizzar fieu; quella è liada vi da la colliaziun d'aua dal nov tunnel;

• montar centralas da ventilaziun cun ventilaturs e sclusas; quels procuran en cas d'in incendi per ina leva surpressiun en il tunnel da segirezza ed en las colliaziuns traversalas ed impedeschan uschia ch'il fim po penetrar en ils spazis protegids;

• installar la tecnica da segirezza, l'illuminaziun ed ils indrizs da communicaziun.

Las colliaziuns traversalas
Il nov tunnel da l'Alvra dispona da totalmain 12 colliaziuns traversalas cun il tunnel da segirezza. Questas colliaziuns traversalas èn plazzadas en distanzas da 425 fin 460 meters. Ellas sa distinguan tras las suandantas caracteristicas:

• trais colliaziuns traversalas èn charrablas cun ambulanzas ed han in'extensiun en furma da trumbetta per ch'ils vehichels possian entrar e sa volver meglier;

• las colliaziuns traversalas han ina lunghezza da mintgamai 25 meters;

• en mintga colliaziun traversala sa chatta da la vart dal nov tunnel in isch per fugir che sa lascha avrir tgunsch e che sa serra da sasez cun ina resistenza al fieu da fin trais uras;

• mintga colliaziun traversala dispona d'ina stanza da tecnica per ils indrizs electrics ed electrotecnics.

Il revestgiment dal tunnel
Il revestgiment intern purtant vegn construì cun betun preparà al lieu resp. cun betun da sprizzar. Il profil dal tunnel cun sia furma da fier-chaval è optimà per il manaschi da viafier a binari metric. Da tuttas duas varts dal vial vegnan construids banchets ch'èn transibels per lavurs da mantegniment ed en cas d'urgenza. En ils banchets èn installads ils cabels per ils indrizs electrotecnics. D'ina vart dals binaris sa chatta la via da sortida en cas d'urgenza; ella è in meter lada. Questa via maina directamain en il tunnel da segirezza. La via da sortida vegn equipada cun in tschabargal ed in'illuminaziun d'urgenza automatica.

L'aua dal culm e l'aua da manaschi
Suenter che la perfuraziun dal tunnel è segirada, vegn isolà l'arvieut. L'aua dal culm schubra che affluescha vegn manada en la drenascha dal tunnel. A las fins dal tunnel cula ella directamain en las auas da surfatscha. Per l'aua che vegn duvrada en connex cun las lavurs en il tunnel è installada en il palantschieu dal tunnel ina segunda lingia separada per l'aua tschuffa. Sch'il tunnel vegn nettegià u en cas d'in disturbi, vegn l'aua tschuffa manada en in implant sper il portal da Preda resp. Spinas e dismessa là a moda professiunala.

Il vial
Il vial dal nov tunnel da l'Alvra vegn construì sco vial fix e remplazza uschia il sistem da fin ussa cun surstructura da glera. Ils binaris vegnan montads a moda fitg precisa e fixa en ina platta da betun preparà al lieu. Regulaziuns futuras dals binaris vegnan fatgas mo pli en la dimensiun da millimeters. L'auta precisiun dals binaris reducescha l'isada da las rodas e da las rodaglias e prolunghescha uschia la vita da quellas. A medem temp è l'implant pli simpel da mantegnair ch'in vial da glera.

L'electricitad
En il nov tunnel da l'Alvra remplazza in binari cun current electric montà vi dal plafond il sistem da fin ussa cun lingias da transmissiun a chadaina. La lingia da contact vegn secziunada tar ils portals ed entamez il tunnel cun separaders e po uschia vegnir reglada independentamain. Il return dal current electric vegn garantì cun in concept da colliaziun cun la terra tenor il pli nov stadi tecnic.

Il sistem da controlla
L'indriz da segirezza vegn renovà ed adattà a las pretensiuns dal nov concept da manaschi e da segirezza. Entamez il tunnel vegn installà in nov traject da bloccada. Uschia pon ils temps tranter ils trens circulants bunamain vegnir smesads sin var trais minutas. Quai augmenta la stabilitad da l'urari sin la lingia da l'Alvra.

Ils indrizs da cabel
Mintgamai dus cabels radiants garanteschan la colliaziun radiofonica en tuts dus tunnels. Els èn integrads en la rait radiofonica existenta da la VR. En in bloc da bischens da cabels en il banchet sanester dal nov tunnel vegnan installads tranter auter ils cabels d'auta tensiun. Tut ils cabels da bassa tensiun per l'electricitad e la communicaziun vegnan manads tras bischens ed installads en il chanal da cabels da la surfatscha en il banchet a dretga. Ils cabels collian ils implants en il tunnel, en las stanzas da tecnica, en las colliaziuns traversalas ed en il tunnel da segirezza.