La muntogna

La muntogna -

Per pudair tscherner il dretg concept da perfuraziun per la construcziun da tunnels èsi impurtant d'enconuscher las cundiziuns geologicas localas. Il profil geologic dal tunnel da l'Alvra sa distingua tras sia cumposiziun da pliras stresas. Per definir exactamain la successiun da las stresas dals differents tips da crap han ins consultà documents istorics da la construcziun da l'emprim tunnel da l'Alvra e fatg examinaziuns preliminaras detagliadas.

Per il project da construcziun èsi impurtant d'enconuscher uschè bain sco pussaivel las cundiziuns geologicas ed idrogeologicas. Grazia a las examinaziuns geologic-geotecnicas ed idrogeologicas pon ins definir ils differents tips da crap e la quantitad d'aua en la muntogna ed uschia elavurar ils concepts da perfuraziun adattads. Questas examinaziuns èn fitg impurtantas. Cun ils resultats pon ins minimar surpraisas privlusas sco per exempel irrupziuns d'aua nunspetgadas durant la perfuraziun.

Ins ha fatg tranter auter las suandantas examinaziuns:

  • sondagis orizontals da 30 m en la corniola da Raibl dal tunnel existent; tranter auter per eruir la pressiun da l'aua e las relaziuns dal current da l'aua.

  • 23 sondagis curts en il tunnel existent (provas per las analisas da labor).

  • scans optics da las paraids cun foras da sondagis per eruir l'orientaziun da las stresas e sfessas.

  • analisas da labor per eruir la caracteristica geotecnica da las provas dal crap.

  • provas d'aua per eruir la caracteristica idrochemica e l'eventuala agressivitad cunter il betun, sco per exempel la valur pH e la concentraziun da sulfat.

  • mesiraziuns seismicas per eruir la posiziun da las ruttadiras inversas.

  • sclerì las pussaivladads d'utilisaziun dal material exchavà.

  • 7 sondagis en la surfatscha per eruir las zonas da crappa lucca.

  • endrizzà als dus portals dal tunnel ed en il tunnel posts per mesirar la quantitad d'aua persa en il tunnel.

  • provas da coluraziun cumplexas per eruir la via da l'aua.

  • endrizzà posts per mesirar la deflussiun ed il livel d'auas a la surfatscha e d'auas sutterranas per examinar e survegliar las cundiziun idrogeologicas.

  • exchavà ina caverna sin l'axa dal tunnel planisada e davent da là fatg sondagis d'exploraziun per lung da l'axa dal tunnel planisada per eruir las relaziuns exactas en la corniola da Raibl.

  • provas d'injectar cement per planisar las lavurs da tunnel spezialas en la «corniola flottanta».

 

Ins ha evaluà ils resultats da las novas examinaziuns ed ils documents istorics. Uschia han ins survegnì novas enconuschientschas davart la furmaziun da la muntogna. Grazia als rapports istorics ed a las novas examinaziuns èn las ristgas bain visiblas ed ins ha pudì tscherner metodas da construcziun adattadas per las tschintg differentas sorts da crap che ston vegnir perfuradas per construir il tunnel.

Grazia a las enconuschientschas ch'ins ha fatg cun las examinaziuns èn la Viafier retica e l'interpresa da construcziun executiva preparadas a moda optimala per la construcziun nova dal tunnel da l'Alvra.

Ils singuls pass da lavur èn vegnids planisads gia avant che las lavurs dal tunnel da l'Alvra han cumenzà. Per controllar il progress da construcziun èsi spezialmain impurtant da parter las incumbensas en singulas fasas da construcziun:

Danunder vegn l'aua?

Danunder vegn l'aua?

Per la Viafier retica èsi fitg impurtant da betg far stalivar funtaunas ed auals. Perquai èsi impurtant da chapir co che las funtaunas e las auas a la surfatscha èn dependentas da las cundiziuns idrogeologicas en la muntogna.

A l'entschatta…

A l'entschatta…

La regiun enturn il tunnel da l'Alvra n'era betg adina amez la muntogna. Avant blers milliuns onns era Preda sper la mar. L'istorgia interessanta davart l'origin da las Alps na fascinescha betg mo ils geologs.

Ins ha evaluà ils resultats da las novas examinaziuns ed ils documents istorics. Uschia han ins survegnì novas enconuschientschas davart la furmaziun da la muntogna. Grazia als rapports istorics ed a las novas examinaziuns èn las ristgas bain visiblas ed ins ha pudì tscherner metodas da construcziun adattadas per las tschintg differentas sorts da crap che ston vegnir perfuradas per construir il tunnel.

Plattì da l'Allgäu

Plattì da l'Allgäu

Cura ch'ins ha construì il tunnel vegl, han ins caracterisà il plattì da l'Allgäu sco plattì da chaltschina e marna. El è sa mussà sco crap plitost lom, dentant relativamain solid, stabil e nunproblematic en l'emprima mesadad. Davent da la segunda mesadad dal sectur datti però adina dapli access d'aua.

Corniola da Raibl

Corniola da Raibl

Da la construcziun da l'emprim tunnel è la corniola da Raibl sa mussada sco material fitg lom ch'ins po sbuvar tgunsch sur lungs tocs. Ils access d'aua èn dentant s'augmentads cuntinuadamain e suenter 1192 meters han els cuntanschì il maximum. A partir da qua èn las lavurs al plazzal praticamain stadas airi per var 9 mais.

Granit da l'Alvra

Granit da l'Alvra

Il pli lung sectur che sto vegnir perfurà consista da granit da l'Alvra. Gia durant la construcziun da l'emprim tunnel è il granit da l'Alvra sa mussà sco crap dir e cumpact che cuntegna per part bler quarz. La muntogna ch'è stabila n'ha savens betg stuì vegnir revestgida.

Milonit

Milonit

Ils milonits en il tunnel da l'Alvra èn relativamain massivs. Lur crap d'origin n'è betg pli d'enconuscher precis. Cura ch'ins ha construì l'emprim tunnel era il milonit sco ch'i para stabil e nunproblematic, ils emprims 15 meters era el anc aquifer, suenter sitg.

Crappa lucca

Crappa lucca

La crappa lucca cumpiglia la morena da basa ed il material da l'aual al portal a Preda ed a Spinas. En il memorial da la construcziun da l'emprim tunnel han ins descrit la morena da basa sco ferma, sitga e nunproblematica. Il material da l'aual era dentant luc e lom.

Grazia a las enconuschientschas ch'ins ha fatg cun las examinaziuns èn la Viafier retica e l'interpresa da construcziun executiva preparadas a moda optimala per la construcziun nova dal tunnel da l'Alvra.

Ils singuls pass da lavur èn vegnids planisads gia avant che las lavurs dal tunnel da l'Alvra han cumenzà. Per controllar il progress da construcziun èsi spezialmain impurtant da parter las incumbensas en singulas fasas da construcziun:

Lavurs preparatoricas

  • Furnir current, metter a disposiziun conducts d'aua e d'aua persa.

  • Installar las staziuns da construcziun Preda e Spinas, construir ina via d'access ed in sutpassadi provisoric, sviar l'aual a Preda.

  • Far lavurs da mantegniment da la tecnica da segirtad en il tunnel existent.

  • Exchavar ils emprims tschintg meters da las colliaziuns traversalas dal tunnel existent.

  • Semtgar indrizs per elavurar il material e deponias.

 

Construcziun criva dal tunnel

  • Protegids d'in arvieut da bischens vegnan chavads ora ils tschancuns cun crappa lucca a Preda e Spinas.

  • Per construir il nov tunnel vegn siglientà il medem mument da la vart da Preda e da Spinas.

  • Suenter l'avanzament principal en il tunnel vegnan exchavadas las colliaziuns traversalas dal nov tunnel.

Construcziuns interiuras

  • La sola dal tunnel ed il revestgiment dal tunnel vegnan installads davent dal portal a Preda en direcziun da Spinas.

Tecnica viafierila

  • La tecnica viafierila, p.ex. vials e lingias da contact, vegn installada davent da Preda.

Renovaziuns da staziuns

  • Ensemen cun las construcziuns interiuras vegnan renovads ils binaris ed ils perruns da tuttas duas staziuns. Las renovaziuns cumpiglian tranter auter il sutpassadi per persunas a Preda e la punt da Beverin a Spinas.

Preparaziuns per l'avertura

  • Avant ch'il nov tunnel vegnia avert per il traffic, vegnan ils areals d'installaziun ed ils indrizs per il material demontads e las surfatschas utilisadas vegnan recultivadas e renatiralisadas. A medem temp vegnan renatiralisadas las auas currentas.

Il tunnel da l'Alvra vegl daventa in tunnel da segirezza:

  • Suenter ch'il nov tunnel da l'Alvra è vegnì surdà al manaschi da viafier, vegn il tunnel existent midà en in tunnel da segirezza. Tranter auter vegnan installadas las sclusas e la ventilaziun da surpressiun.