Logistica da transport dal plazzal dal tunnel da l'Alvra

Logistica da transport dal plazzal dal tunnel da l'Alvra -

Per ch'ils transfers sin ils plazzals sezs – tranter ils dus portals a Preda ed a Spinas – e la furniziun dals materials da construcziun funcziunan senza incaps, ha la Viafier retica elavurà trais soluziuns da transport individualisadas.

Ils materials da construcziun vegnan transportads per gronda part cun il tren. En emprima lingia duain ils abitants da las vischnancas da Bravuogn e da Bever vegnir stgargiads uschia dal traffic da plazzal. In ulteriur motiv per il transport cun il tren èn las cundiziuns sin via: pervi las vias plain curvas e las limitas da pais e da massa da chargiar han vehichels stradals pli grondas difficultads d'acceder al plazzal da muntogna. En pli engrevgeschan ils tunnels ed ils viaducts stretgs il viadi. Però er il transport cun il tren ha per consequenza intginas restricziuns: pervi da la massa ch'ils vaguns che stattan a disposiziun pon chargiar e pervi dal profil interiur en ils tunnels da la lingia da l'Alvra èsi pussaivel da furnir materials da construcziun mo a moda limitada.

Il sprinter da l'Alvra: per il transfer tranter Preda e Spinas
Durant la fasa da construcziun brutta da las lavurs da tunnel cursescha in tren da shuttle fin otg giadas a di tranter Preda e Spinas. Il tren transporta era material da sbuvada, cumponentas da sablun grop tut tenor basegn e persunal. En cas da manaschi maximal pon vegnir transportadas fin 1 360 tonnas per di. L'andament dals transports funcziuna suandantamain:

 

1.

   

far lavurs da sbuvada en il nov tunnel da vart da Spinas

2.

   

chargiar l'indriz da tschinta da transport en il tunnel

3.

   

transportar il material da sbuvada fin a la staziun dal plazzal a Spinas

4.

   

chargiar il material sin il tren da shuttle

5.

   

far il transfer via il tunnel da l'Alvra existent fin a Preda

6.

   

stgargiar il material sin la staziun dal plazzal a Preda

7.

   

transportar il material sin la tschinta da transport en l'implant da glera sin la plazza d'installaziun a Preda

8.

   

elavurar ulteriuramain il material a granulaziuns da crap per producir betun u glera da viafier

9.

   

transportar il material sin la tschinta da transport davent da l'implant da glera fin a la deponia Las Piazzettas per al magasinar u per al deponer definitivamain sco crap nunadattà

Las cumponentas da betun vegnan reutilisadas pli tard per construir l'interiur dal nov tunnel. Per quest intent vegnan las materialias manadas enavos en il tunnel sur la medema via. Il betun vegn ins ad utilisar tranter auter per revestgir e per segirar il profil dal tunnel.

Il shuttle da l'Alvra: per transportar il material per il plazzal
La cubatura principala dals materials da construcziun necessaris a Preda ed a Spinas duai vegnir furnida cun trens da vitgira. La viafier da vitgira da la Viafier retica porscha als furniturs offertas innovativas per il transport a partir d'in center da transtgargiada da martganzia da la viafier da vitgira da la Viafier retica. Davent da questas staziuns da martganzia vegnan las differentas materialias sco per exempel il cement ed auters materials da basa per la construcziun manads cun la viafier da vitgira en il center da transtgargiada da martganzia a Samedan. Davent da là vegn la vitgira distribuida duas giadas a di a moda individuala e tenor basegn a las duas staziuns dal plazzal a Preda ed a Spinas. Per regla sa splega l'andament da distribuziun suandantamain:

 

1.

 

 

transportar la vitgira cun camiun fin ad ina staziun da martganzia da la Viafier retica

2.

 

 

consegnar ils materials da construcziun a la viafier da vitgira da la Viafier retica

3.

 

 

far il transfer a Samedan en il center da transtgargiada da martganzia

4.

 

 

distribuir la vitgira a las staziuns dal plazzal a Preda ed a Spinas

5.

 

 

transferir il tren spezial da vitgira sin ils binaris morts senza electricitad cun il tractor da manevrar

Il sprinter Grischa: per transportar davent materias da basa per la construcziun a partir da la staziun dal plazzal a Preda
Sin la deponia Las Piazzettas vegn elavurà dal material da sbuvada dal tunnel era glera, crapella e glera da viafier ch'ins na po betg utilisar en il rom dal project Alvra. Quest material vegn u vendì a terzs u utilisà per auters projects da viafier. Per quests transports dovr'ins in'ulteriura cumposiziun da tren da la viafier da vitgira da la Viafier retica. Tut tenor staziun da destinaziun pon vegnir transportadas davent fin 272 tonnas material per tren spezial da vitgira.

Renovaziun da las staziuns da Preda e da Spinas

Renovaziun da las staziuns da Preda e da Spinas

Las staziuns da Preda e da Spinas vegnan adattadas a las novas cundiziuns. Las novaziuns na cumpiglian betg mo il cumplex da binaris per il nov tunnel, mabain era diversas renovaziuns dals edifizis da tecnica en la vischinanza dals portals. La Viafier retica sa stenta fitg da realisar quellas en accord cun l'architectura alpina.

Il plazzal

Il plazzal

Nus construin per Vus al tunnel da l'Alvra. El ha plaunsieu cuntanschì la fin da ses temp da servetsch. Igl è stà necessari d'al sanar u d'al construir da nov. Suenter examinaziuns minuziusas ha la Viafier retica decis l'onn 2010 da construir in nov tunnel a binari metric e da reutilisar il tunnel existent sco tunnel da segirezza.