Renovaziun da las staziuns da Preda e da Spinas
Las staziuns da Preda e da Spinas vegnan adattadas a las novas cundiziuns. Las novaziuns na cumpiglian betg mo il cumplex da binaris per il nov tunnel, mabain era diversas renovaziuns dals edifizis da tecnica en la vischinanza dals portals. La Viafier retica sa stenta fitg da realisar quellas en accord cun l'architectura alpina.
La staziun da Preda
La staziun da Preda survegn da nov in binari a chau per il manaschi da scarsolar cun in perrun correspundent. Il binari da transit 3 vegn spustà en direcziun dals binaris da manevrar. Grazia a quest spustament èsi pussaivel da construir in perrun d'amez pli lad tranter ils binaris 2 e 3. Per arrivar sin quest nov perrun datti da nov in sutpassadi per persunas cun ina rampa ed ina stgala da la vart da la staziun e da la vart dal perrun d'amez. Las rampas e las stgalas sco er ina part dal perrun vegnan cuvertas cun in tetg. Il cumplex da binaris vegn ultra da quai adattà en ils lieus d'access als binaris da manevrar ed al nov tunnel da l'Alvra. Ils dus binaris da manevrar al sid n'èn betg pli necessaris per il manaschi da viafier futur e vegnan allontanads.
Ulteriuras mesiras da construcziun concernan ils edifizis e las auas en la vischinanza directa da la staziun. La staziun resta là, nua ch'ella è. En l'areal dal portal datti in nov edifizi per la tecnica da viafier ed ils indrizs electrics. L'architectura s'orientescha als princips da la cultura da construcziun alpina cun ina fatschada en crap natiral, in tetg a duas alas ed ischs da lain massiv. La chasa da cumond e l'edifizi da ventilaturs na vegnan betg pli duvrads sin fundament dals implants tecnics novs, els restan dentant mantegnids. La chasa da cumond è gia vegnida spustada nov meters en direcziun nord-ost en in nov lieu ordaifer il trassé da viafier futur. Quest edifizi è vegnì remplazzà tras in nov post da cumond extern.
Era la chasa dubla da la guardia da viafier resta mantegnida. Pervia da las novas relaziuns da plazza a la staziun è ella dentant vegnida spustada 23 meters en direcziun nord. La fatschada da la chasa vegn cuverta cun novas schlondas da lain originalas ed il tetg vegn restaurà. La bargia davos la staziun sto guntgir temporarmain a las activitads da construcziun ed è vegnida demontada avant l'entschatta da las lavurs. Pli tard vegn ella dentant puspè installada datiers dal lieu oriund ed il tetg vegn cuvert cun tola confurm a l'original.
Per il temp da construcziun vegn il bigl da la staziun demontà e magasinà cun quità. Cura ch'el vegn reinstallà, vegn el sanà moderadamain. L'aual da S-chagna è vegnì conduì temporarmain en bischens sut terra e vegn manà suenter la fin da las lavurs da construcziun davos la chasa da cumond ed il nov edifizi da tecnica puspè sur terra avant ch'el cula en il tumbin existent sut ils binaris. Ultra da quai datti a la fin dals binaris da manevrar in implant da preparaziun da l'aua cun in spartaieli ed in batschigl da retegn. Quests implants vegnan colliads cun la drenascha dal tunnel.
La staziun da Spinas
A Spinas vegn il concept da binaris existent adattà als novs basegns e tenor la lescha davart l'egualitad da persunas cun impediments. La cruschada vegn prolungada a 400 meters e pussibilitescha uschia che tut las cumposiziuns da tren la pon traversar. Il binari a chau existent vegn allontanà e montà a la fin da la cruschada. Il perrun per binari 1 vegn prolungà a 250 meters e schlargià a 2.30 meters. Il binari 2 na vegn en l'avegnir betg pli duvrà en connex cun il transport da persunas.
Sco a Preda vegnan era prendidas a Spinas differentas mesiras architectonicas vi dals edifizis sin l'areal da la staziun. L'edifizi da la staziun resta en il medem lieu. En l'areal dal portal vegn construì in nov edifizi per la tecnica da viafier ed ils indrizs electrics. L'architectura da quest edifizi s'orientescha als princips da la cultura da construcziun alpina cun ina fatschada en crap natiral. Er ulteriurs aspects da l'architectura tradiziunala vegnan integrads. La chasa da cumond mantegna sia funcziun per il stabiliment da lingias da contact e vegn reparada.
Il fundament da crap natiral original da la centrala electrica – che vegn duvrada oz sco chasa d'abitar – vegn rendì visibel. L'edifizi da ventilaturs vegn allontanà per far plazza al nov trassé. Las fatschadas da las tualettas vegnan mantegnidas cumplettamain en il stadi original e restauradas levamain.
La punt dal Beverin existenta tranter il tunnel e l'edifizi da la staziun è vegnida construida il 1902. En consequenza da sia vegliadetgna e da la nova situaziun da binaris vegn ella allontanada. Enstagl vegn construì ina nova punt che cumpiglia ils dus binaris, in access al tunnel da segirezza ed ina passarella da servetsch.
Sut la punt vegn il Beverin schlargià e renaturà. Sper ils chanals principals vegnan creadas en il letg dal flum
deflussiuns secundaras e secturs d'aua stagnada. La regiun umida da la Val Bever vegn uschia revalitada.
