Perfuraziun dal tunnel da l'Alvra
Il tunnel vegn construì a medem temp davent da Preda e davent da Spinas. Questa metoda empermetta in temp da construcziun pli curt ed avunda flexibilitad, en cas che las lavurs da tunnel duessan vegnir disturbadas d'ina vart. En pli arriv'ins uschia il pli svelt pussaivel al granit da l'Alvra d'auta qualitad. Quel vegn elavurà ulteriuramain.
En connex cun la dumonda tgenina ch'è la meglra metoda per las lavurs da tunnel resguard'ins differents facturs. Ultra dals custs e da la planisaziun dal temp sto uschia per exempel era vegnir resguardà l'access al plazzal ed il manaschi da viafier sto esser garantì. Co che las lavurs da tunnel vegnan la finala fatgas resulta da las cundiziuns geologicas ed economicas avant maun. Per la construcziun dal tunnel da l'Alvra han però ultra da quai giugà ina rolla er ils aspects da l'ambient. Quels inditgan da perfurar il tunnel cun siglientar. Cun siglientar datti fin 21% pli pauc material da sbuvada che cun perfurar il tunnel cun ina maschina. Quai ha l'avantatg ch'ins sto utilisar e deponer considerablamain pli pauc material. Cun siglientar po il tagl traversal da la sbuvada vegnir adattà flexiblamain ed a curt termin als differents craps.
Il crap dir dal massiv da l'Alvra prendan ils miniers per mauns cun material explosiv. En grip normal vegn sbuvà en etappas da 3 fin 4 meters.
Il process da siglientar è il suandant:
|
1. |
furar a la front da las lavurs da tunnel las foras da sondagi cun il vehichel spezial da furar |
||||
|
2. |
far liber las foras da sondagi e las controllar |
||||
|
3. |
chargiar las foras da sondagi cun material explosiv e cun indrizs d'envidar |
||||
|
4. |
montar il sistem d'envidar: installar il cirquit electric e colliar las cordas d'envidar cun l'envidader |
||||
|
5. |
isolar las foras da sondagi e las controllar |
||||
|
6. |
bandunar la plazza da lavur e sa render en il container da protecziun |
||||
|
7. |
siglientar |
||||
|
8. |
spetgar en il container da protecziun fin che la pulvra e la fimera / il gas da l'explosiun èn tschessads e fin che avunda aria frestga è avant maun |
||||
|
9. |
controllar, sche crappa è vegnida lucca en il profil siglientà e nettegiar il grip |
||||
|
10. |
segirar il sectur da lavur cun ancras, mattas d'armadira e betun injectà |
||||
|
11. |
far mantè: prender si e transportar davent il material da sbuvada |
Il tunnel da l'Alvra vegn siglientà prest per lung da tut la lunghezza da 5860 m. Exceptads èn unicamain ils entagls preliminars che vegnan fatgs sur terra ed ils tschancuns cun crappa lucca (ca. 257 m) sco era la zona da la corniola da Raibl (ca. 130 m), nua che la perfuraziun vegn fatga a moda mecanica cun il tarader da sbuvar. En ils secturs da crappa lucca e da corniola dovri proceders differenziads pervi da la configuraziun particulara dal crap:
Entagls preliminars: Per pudair cumenzar cun las lavurs da tunnel sutterranas vegn construida l'emprim ina paraid dal stgav verticala che cuvra tut il profil dal tunnel. Quest stgav vegn numnà «entagl preliminar» (en il terren) per la perfuraziun dal tunnel sutterrana che suonda. L'entagl preliminar na vegn betg construì sut terra, mabain sur terra.
Preda: Il stgav da l'entagl preliminar vegn segirà en direcziun dal tunnel existent cun ina paraid da pitgas da betun furadas en il terren ch'è averta e cuntrafrancada. La finiziun dal stgav visavi vegn segirada ils ultims meters davant la paraid da portal cun il medem sistem. Las ulteriuras scarpas vegnan francadas cun paraids enguttadas. Il nov portal vegn spustà in pau pli enavos che l'entrada dal tunnel da l'Alvra existent. El vegn revestgì cun crappa natirala.
Spinas: La scarpa al nord da la vart dal nov tunnel vegn segirada a maun d'ina paraid enguttada. Il nov portal vegn construì en la prolungaziun dal portal existent e medemamain revestgì cun crappa natirala.
Crappa lucca
Las lavurs da sbuvada sin ils tschancuns cun crappa lucca a la surfatscha da vart da Preda (27 m) e da Spinas (230 m) vegnan fatgas cun ina protecziun en furma d'in arvieut da bischens d'atschal. Il tunnel che vegn sbuvà vegn munì cun bischens d'atschal d'ina lunghezza da fin 15 meters, ils quals vegnan plazzads a l'exteriur dal tagl traversal che vegn sbuvà e quai en direcziun per lung dal tunnel. Per quest intent vegnan fatgs en in emprim pass sondagis. En in segund pass vegnan ils bischens plazzads en ils sondagis e pressads da dadens e da dadora cun injecziuns da cement. Quest arvieut meglierescha il grip cunfinant uschè bain ch'il tunnel po vegnir sbuvà e segirà en curtas etappas. Mintga 10 meters vegn erigì in nov arvieut da bischens d'atschal. Uschia sa cruschan ils arvieuts.
Corniola da Raibl
Per furar tras la corniola vegn il grip tractà preliminarmain. Il grip circumdant vegn endirì e la permeabladad vegn reducida. Tut tenor il stadi dal crap pon ins cuntanscher quai differentamain. Ils emprims ca. 100 meters vegn il grip endirì ed a medem temp stuppà a maun d'injecziuns. Ils ultims 25 meters sa tracti da grippa flottanta che vegn stabilisada e stuppada cun glatsch. Per far glatsch vegnan fatgs sondagis davent d'ina chaverna endrizzada ordavant en il grip gist suenter la corniola da Raibl. Ils sondagis van en direcziun per lung dal profil da sbuvada futur. En quests sondagis vegnan lura installads ils bischens da schelentar, ils quals vegnan colliads cun ils agregats da sfradentar en la chaverna. Uschia schela l'aua en il grip e l'entir sectur dal grip vegn endirì e stuppà. Lura vegn furà tras il sectur schelà in profil da tunnel prest radund cun ina buna statica. I vegn sbuvà e segirà en etappas curtas dad 1 meter.
