Bellezza natirala: il parc natiral Parc Ela
La diversitad da la natira sa preschenta qua a moda impressiunanta: il parc natiral amez il Grischun en ina cuntrada da pass selvadia carmala cun ina natira intacta, vitgs originars ed in patrimoni cultural che dat perditga dal commerzi e dal barat da millis d'onns tranter nord e sid.
Glatschers e champs da naiv perpetna caracteriseschan il territori dal Kesch e dal Ducan. Palids autas e bassas cun lais da muntogna furman sin l'Alp Flex in mosaic variant. La cuntrada dal Parc Ela è plain cuntraris. Ina giada criva e selvadia. L'autra giada miaivla e romantica. Ella fascinescha adina puspè da nov.
Cun ina surfatscha da 548 kilometers quadrat è il Parc Ela il pli grond parc natiral da la Svizra. El sa chatta en ina cuntrada multifara enturn ils pass da l'Alvra, dal Güglia, e dal Set. Il parc porscha ina natira originara, vitgs rumantschs intacts ed ina cultura vivida en rumantsch, talian e tudestg. Las vischnancas dal parc natiral lavuran ensemen per rinforzar l'economia regiunala, per proteger la natira e la cuntrada e per mantegnair il patrimoni cultural.
Dapi il 2012 porta il Parc Ela uffizialmain il label «parc natiral regiunal d'impurtanza naziunala». Fin il 2021 survegn el subsidis da la Confederaziun e dal Chantun. Il 2021 sto il label vegnir dumandà da nov. L'uniun Parc Ela sco purtadra dal parc natiral s'occupa da la realisaziun e dal svilup dal concept dal parc e realisescha ensemen cun partenaris locals numerus projects en ils secturs natira, cultura, cuntrada, turissem, products regiunals, energia, traffic, furmaziun e perscrutaziun.
